ខេត្តព្រះសីហនុ-ដោយ: សុភ័ក្ត្រ
នាព្រឹកថ្ងៃចន្ទ ១៣កើត ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៥ ខែមិថុនា ឆ្នាំ២០១៨ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោក បេសសូ ខេនអ៊ិឈិ ភារធារីស្តីទីនៃស្ថានទូតជប៉ុនប្រចាំនៅកម្ពុជាអញ្ជើញជាអធិបតីដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការចំណតផែពហុបំណងនៃកំពង់ផែស្វយ័តក្រុងព្រះសីហនុ ខេត្តព្រះសីហនុ។
ថ្លែងក្នុងពិធីសម្ភោធចំណតផែពហុបំណងនៃកំពង់ផែស្វយ័តក្រុងព្រះសីហនុ ខេត្តព្រះសីហនុ នៅចំពោះមុខប្រជាពលរដ្ឋ លោកគ្រូអ្នកគ្រូ មន្ត្រីរាជការ សិស្សានុសិស្សចំនួន ៦,០៤៩នាក់ សម្តេចតេជោ ហ៊ុន សែន បានមានប្រសាសន៍ថា÷ “កាលពីមុនកំពង់ផែក្រុងព្រះសីហនុនេះដឹកទំនិញបានត្រឹមតែ ១ម៉ឺនតោនតែប៉ុណ្ណោះ។ ដូច្នេះ យើងមិនស្កប់ស្កល់ត្រឹមប៉ុណ្ណឹងទេក្នុងការអភិវឌ្ឍកំពង់ផែដឹកទំនិញនៅស្រុកយើង។ យើងបានពង្រីកផែនេះបន្តទៀត ដើម្បីឱ្យកប៉ាល់ទំនិញធំៗមានលទ្ធភាពចេញចូលតាមច្រកកំពង់ផែនេះឱ្យកាន់តែប្រសើរថែមទៀត រហូតដល់ជម្រៅទឹក ១៤,៥០ម៉ែត្រ និងនាវាដឹកទំនិញទម្ងន់ ៦ម៉ឺនតោន អាចចេញចូលបានដោយមិនចាំបាច់ផ្ទេរលើកដាក់ច្រើនដងនាំឱ្យមានការចំណាយច្រើន និងខាតពេលវេលាក្នុងការដឹកជញ្ជូន”។
សម្តេចតេជោ នាយករដ្ឋមន្ត្រី បានបន្តថា ចំណតផែនេះគឺជាច្រកទ្វារសេដ្ឋកិច្ចជាតិមួយដ៏សំខាន់សម្រាប់ដោះដូរផលិតផលកសិកម្ម និងកសិ-ឧស្សាហកម្មរបស់កម្ពុជាទៅកាន់ទីផ្សារពិភពលោកដោយបានតភ្ជាប់ទៅនឹងផ្លូវជាតិលេខ២ លេខ៣ និងលេខ៤ ព្រមទាំងផ្លូវរថភ្លើង និងជាពិសេសផ្លូវល្បឿនលឿន (ភ្នំពេញ-ព្រះសីហនុ) ដែលគ្រោងនឹងបើកការដ្ឋានសាងសង់ក្នុងពេលឆាប់ៗខាងមុខនេះ។
សម្តេចតេជោ នាយករដ្ឋមន្ត្រី បានរម្លឹកពីគុណបំណាច់ដ៏ធំធេងនៃសមិទ្ធផលដែលជាស្នាព្រះហស្ថរបស់សម្តេចព្រះបរមតរនកោដ្ឋ នរោត្តម សីហនុ ដែលព្រះអង្គបានបន្សល់ទុកនូវកំពង់ផែខេត្តព្រះសីហនុនេះ។ ដោយសារសង្គ្រាមអំឡុងឆ្នាំ១៩៧០ កំពង់ផែនេះត្រូវបានទទួលរងនូវការបាត់បង់ខូចខាត ហើយផ្លូវរថភ្លើងមួយចំនួនក៏បានកាត់ផ្តាច់ផងដែរ។
នៅក្នុងសម័យប្រល័យពូជសាសន៍ប៉ុលពត កំពង់ផែនេះក៏ត្រូវបានបំផ្លិចបំផ្លាញជាបន្តបន្ទាប់ ក្រោយមកដោយសារតែនយោបាយឈ្នះ-ឈ្នះ របស់សម្តេចតេជោ គឺបានប្រែក្លាយកំពង់ផែមួយនេះមានការអភិវឌ្ឍរីកចម្រើនជាបន្តបន្ទាប់ដល់សព្វថ្ងៃនេះ។ កន្លងមកក៏មានស្នើ និងទាមទារពីបុគ្គលមួយចំនួនដើម្បីដាក់កំពង់ផែនេះឱ្យនៅក្រោមការគ្រប់គ្រងរបស់ក្រុមហ៊ុនឯកជន។
ប៉ុន្តែសម្តេចតេជោ មិនយល់ស្របឡើយ ព្រោះជាកំពង់ផែរបស់រដ្ឋ ប្រសិនបើដាក់ឱ្យឯកជនគ្រប់គ្រងគឺអាចនឹងបាត់បង់ចំណូលយ៉ាងសន្ឋឹកសន្ឋាប់។ សម្តេចតេជោ ហ៊ុន សែន បានខិតខំថែរក្សាការពារកំពង់ផែមួយនេះរហូតទទួលបានជោគជ័យមកទល់សព្វថ្ងៃដែលកំពុងរកចំណូលចូលប្រទេសជាតិបានយ៉ាងច្រើន។
សម្តេចតេជោ ហ៊ុន សែន បានថ្លែងអំណរគុណយ៉ាងជ្រាលជ្រៅបំផុតចំពោះរដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងការផ្តល់ហិរញ្ញប្បទានសម្បទានសាងសង់ចំណតផែពហុបំណងនៃកំពង់ផែស្វយ័តក្រុងព្រះសីហនុក្នុងការបម្រើដល់វិស័យ សេដ្ឋកិច្ច ពាណិជ្ជកម្ម ក្នុងការដឹកជញ្ជូនទំនិញចេញចូលផ្សេងៗ។
ក្នុងឱកាសនេះដែរ ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងថា ផែពហុបំណងនៃកំពង់ផែស្វយ័តក្រុងព្រះសីហនុ បានចំណាយថវិកាអស់ចំនួន ៧៤លានដុល្លារអាមេរិក ក្រោមហិរញ្ញប្បទានសម្បទានរបស់រដ្ឋាភិបាលជប៉ុនតាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងក្របខណ្ឌនៃការអនុវត្តគម្រោងអភិវឌ្ឍន៍ចំណតផែពហុបំណងនៃកំពង់ផែស្វយ័តក្រុងព្រះសីហនុរួមជាមួយថវិកាបដិភាគរបស់រាជរដ្ឋាភិបាលកម្ពុជាសម្រាប់ទទួលបន្ទុកលើការបង់ពន្ធ និងអាករផ្សេងៗ។
ចំណតផែពហុបំណងនៃកំពង់ផែស្វយ័តក្រុងព្រះសីហនុបានចាប់ផ្តើមសាងសង់ពីឆ្នាំ២០១៥ ហើយបានបញ្ចប់នៅពាក់កណ្តាលឆ្នាំ២០១៨នេះ។ ចំណតនេះជាច្រកទ្វារដោះដូរទំនិញយ៉ាងសំខាន់ អាចឱ្យនាវាដឹកទំនិញធន់ធំទំហំ ៥ម៉ឺនតោនចូលចតបាន ហើយនាវាធំៗអាចចូលចតនៅកំពង់ផែនេះបាន និងមានតម្លៃទាបជាងមុនទៀតផង។
ចំណតផែពហុបំណងនៃកំពង់ផែស្វយ័តក្រុងព្រះសីហនុ ដែលសម្ពោធដាក់ឲ្យប្រើប្រាស់នេះរួមមាន ÷ ចំណតផែទំនិញរាយប្រវែង ៣៣០ម៉ែត្រ ជម្រៅទឹក ១៣,៥ម៉ែត្រ , ចំណតផែមូលដ្ឋានផ្គត់ផ្គង់ព័ស្តុភារសម្រាប់ការរុករកប្រេងប្រវែង ២០០ម៉ែត្រ ជម្រៅទឹក ៧,៥ម៉ែត្រ និងការផ្គត់ផ្គង់នាវាសណ្តោង (Tugboat)។
តាមផែនការ រាជរដ្ឋាភិបាលកម្ពុជា ក៏មានគម្រោងពង្រីកកំពង់ផែទំនិញទឹកជ្រៅមួយបន្ថែមទៀត ដែលមានជម្រៅទឹក ១៤.៥០ម៉ែត្រ ដោយចាប់ផ្តើមសាងសង់នៅឆ្នាំ២០១៩ និងបញ្ចប់នៅចុងឆ្នាំ២០២២ និងដើមឆ្នាំ២០២៣ ដោយចំណាយថវិកាចំនួន ២០៣លានដុល្លារអាមេរិក៕
