ខេត្តមណ្ឌលគិរី-ដោយ: ក.ស្រីម៉ៅ
ក្រសួងបរិស្ថានបានរៀបវេទិកាស្តីពី “ការការពារ និងអភិរក្សធនធានធម្មជាតិ” លើប្រធានបទ “ការរៀបចំសម្ព័ន្ធសហភាពសហគមន៍អភិរក្សធនធានធម្មជាតិ” រយៈពេល ២ថ្ងៃ នៅខេត្តមណ្ឌលគិរី។
វេទិកានេះមានវត្តមាន ឯកឧត្តម សូ ខនឫទ្ធីគុណ អនុរដ្ឋលេខាធិការក្រសួងបរិស្ថាន បានអញ្ជើញជាអធិបតី និង មានការចូលរួមពី ឯកឧត្តម ញ៉ន សិទ្ធ អភិបាលរងខេត្តមណ្ឌលគិរី ព្រមទាំងលោក-លោកស្រីមកពីអគ្គនាយកដ្ឋានក្រសួងបរិស្ថាន មន្ត្រីដែនជម្រកតំបន់ការពារធនធានធម្មជាតិ គណៈកម្មាធិការសហគមន៍ និងអង្គការដៃគូពាក់ព័ន្ធប្រមាណជាង ២០០នាក់ ដែលប្រព្រឹត្តទៅនៅសណ្ឋាគារ អេម៉ារីអូរ ស្ថិតនៅក្រុងសែនមនោរម្យ ខេត្តមណ្ឌលគិរី នាព្រឹកថ្ងៃអង្គារ ១៤រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១២ ខែមិថុនា ឆ្នាំ២០១៨ ។
ឯកឧត្តម សូ ខនឫទ្ធីគុណ អនុរដ្ឋលេខាធិការក្រសួងបរិស្ថាន បានមានប្រសាសន៍ថា ការរៀបចំវេទិកានេះឡើងក្នុងគោលបំណងដើម្បីដាក់ចេញជាយន្តការសម្របសម្រួលមួយសម្រាប់សហគមន៍តំបន់ការពារ ធម្មជាតិក្នុងដែនសមត្ថកិច្ចរបស់ក្រសួងបរិស្ថាន ក្នុងការពង្រឹងប្រសិទ្ធភាពនៃប្រព័ន្ធគ្រប់គ្រងធនធានធម្មជាតិ ពង្រឹងទំនាក់ទំនងក្នុងចំណោមសហគមន៍តំបន់ការពារ ធម្មជាតិ។
វេទិកានេះមានការចូលរួមពិភាក្សា និងធ្វើបច្ចុប្បន្នភាពពីការងារពាក់ព័ន្ធនឹងការការពារអភិរក្សធនធានធម្មជាតិចងក្រងសហគមន៍ទាំងនោះជាសម្ព័ន្ធ ដើម្បីឱ្យសហគមន៍យកទៅធ្វើដើមទុន ឬទុនបង្វិលសម្រាប់ជួយដល់សមាជិកសហគមន៍ក្នុងការធ្វើអាជីវកម្ម បង្កើតមុខរបរថ្មីចិញ្ចឹមជីវិតបន្ថែមពីលើមុខរបររបស់គាត់ដែលមាន និងចូលរួមចំណែកក្នុងការការពារអភិរក្សទប់ស្កាត់បទល្មើសផ្សេងៗឱ្យមានប្រសិទ្ធភាពខ្ពស់។
ឯកឧត្តម ញ៉ន សិទ្ធ អភិបាលរងខេត្តមណ្ឌលគិរី បានឱ្យដឹងថា ខេត្តមណ្ឌលគិរីមានតំបន់ព្រៃការពារ និងមណ្ឌលសត្វព្រៃចំនួន ៥កន្លែង មានផ្ទៃដីសរុបចំនួន ១.១៨៥.៦១១ហិកតា ពោលគឺព្រៃការពារដែនជម្រកណាំលៀ ដែនជម្រកភ្នំព្រិច ដែនជម្រកស្រែពក ដែនជម្រកកែវសីមា ដែនជម្រកលំផាត់ និងមានតំបន់ការពារជីវៈចម្រុះ ២០សហគមន៍ និងសហគមន៍ព្រៃឈើមានចំនួន ០៨សហគមន៍ ដែលស្ថិតនៅក្បែរតំបន់ការពារទាំង ៥នោះ។
ឯកឧត្តមអភិបាលរង បានបន្តថា ការចងក្រងបណ្តាញសហគមន៍នេះ ជាផ្នែកមួយដើម្បីឆ្លើយតបទៅនឹងគោលដៅជាយុទ្ធសាស្ត្ររបស់រាជរដ្ឋាភិបាលកម្ពុជាក្នុងការទប់ស្កាត់បទល្មើសព្រៃឈើ ព្រមទាំងពង្រឹងតួនាទីរបស់សហគមន៍មូលដ្ឋានក្នុងការចងក្រងជាបណ្តាញចូលរួមការពារធនធានធម្មជាតិ និងបង្កើនផលប្រយោជន៍របស់សហគមន៍មូលដ្ឋានផងដែរ៕
