ខេត្តព្រះសីហនុ-ដោយ: សុភ័ក្ត្រ
មន្ត្រីកងរាជអាវុធហត្ថ លោកអនុសេនីយ៍ឯក ញា វិសិទ្ធ អនុប្រធានមន្ទីរស្រាវជ្រាវយុត្តិធម៌ នៃទីបញ្ជាការដ្ឋានកងរាជអាវុធហត្ថខេត្តព្រះសីហនុ បានរងរបួសធ្ងន់នៅក្នុងហេតុការណ៍ចុះបំពេញបេសកកម្មតាមបទបញ្ជារបស់គណៈបញ្ជាការឯកភាពខេត្ត ក៏ដូចជាចុះអនុវត្តទៅតាមបទបញ្ជារបស់មេបញ្ជាការកងរាជអាវុធហត្ថខេត្តព្រះសីហនុ ទាក់ទងទៅនឹងពាក្យបណ្តឹងរបស់ប្រជាពលរដ្ឋរងគ្រោះដោយសារ សកម្មភាពវាយបំផ្លាញផ្ទះសំបែងចំនួន ៥ខ្នង និងវាយដំមនុស្សឱ្យរងរបួស ៤នាក់ រួមនឹងដុតម៉ូតូ ១គ្រឿង ដោយស្នាដៃឈ្មោះ មឿង ស្រីទូច និងគូកនដែលកំពុងកែនប្រជាពលរដ្ឋដោយខុសច្បាប់ទន្ទ្រានយកដីគម្របព្រៃឈើរដ្ឋកើតឡើងនៅចំណុចពយម៉ាចូវ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ នាពេលថ្មីៗនេះ។
តាមការឱ្យដឹងពីលោកអនុសេនីយ៍ឯក ញា វិសិទ្ធ បានរៀបរាប់ទាំងឈឺចុកចាប់ថា បន្ទាប់ពីទទួលបានពាក្យបណ្តឹងរបស់ប្រជាពលរដ្ឋជាកម្មករចាំចម្ការនៅចំណុចទីតាំងខាងលើនេះថា មានករណីជម្លោះកើតឡើងរវាងកម្មករចាំចម្ការ និងកម្មករចាំចម្ការ ដោយឈ្មោះ មឿង ស្រីទូច ដែលកន្លងមកអះអាងថា ជាក្មួយបង្កើតរបស់ថ្នាក់ដឹកនាំជាន់ខ្ពស់នៅរាជធានីភ្នំពេញ បានបញ្ជាឱ្យកម្មកររបស់ខ្លួនប្រើហិង្សាដុតបំផ្លាញម៉ូតូកម្មករចាំចម្ការភាគីម្ខាងទៀត។
លោកអនុសេនីយ៍ឯក ញា វិសិទ្ធ បន្តថា បន្ទាប់ពីទទួលបានពាក្យបណ្តឹង និងទទួលបទបញ្ជារបស់ប្រធានគណៈបញ្ជាការឯកភាពខេត្ត និងបទបញ្ជារបស់មេបញ្ជាការកងរាជអាវុធហត្ថខេត្ត នៅម៉ោងប្រមាណ ១១:០០នាទីថ្ងៃត្រង់ ថ្ងៃទី០៩ ខែមិថុនា ឆ្នាំ២០១៨ កម្លាំងកងរាជអាវុធហត្ថ នៃមន្ទីរស្រាវជ្រាវយុត្តិធម៌បានចុះដល់កន្លែងកើតហេតុ និងទីតាំងដីចម្ការ អ្នកស្រី មឿង ស្រីទូច ក្នុងគោលបំណងពិនិត្យ និងអញ្ជើញអ្នកស្រី មឿង ស្រីទូច ព្រមទាំងបក្ខពួកមកសួរនាំដើម្បីកសាងសំណុំរឿងទៅតាមនីតិវិធី។
លោកអនុប្រធានមន្ទីរស្រាវជ្រាវយុត្តិធម៌ បន្តទៀតថា បន្ទាប់ពីកម្លាំងសមត្ថកិច្ចកងរាជអាវុធហត្ថទៅដល់ភ្លាម ឈ្មោះ មឿង ស្រីទូច បានលើកទូរស័ព្ទខលឆ្វាត់ឆ្វែងទំនងជារកការជួយអន្តរាគមន៍ ខណៈនោះ លោក ញា វិសិទ្ធ បានអញ្ជើញ មឿង ស្រីទូច និងបក្ខពួកដែលគេអះអាងថាជាអង្គរក្សឱ្យមកកាន់ទីបញ្ជាការដ្ឋានដើម្បីសួរនាំទៅតាមនីតិវិធី។
លោក ញា វិសិទ្ធ បានបន្ថែមទៀតថា លោកក៏បានឡើងជិះរថយន្ត៥៧០ ជាមួយឈ្មោះ មឿង ស្រីទូច បន្ទាប់ពីលោកឡើងជិះនៅក្នុងរថយន្តខាងលើ មឿង ស្រីទូច ឡើងទៅកាន់ចង្កូតបើកបរ និងប្តូរឱ្យអង្គរក្សរបស់គេមកអង្គុយជិតលោកវិញ ហាក់បីដូចជាមានគម្រោងផែនការក្នុងការធ្វើសកម្មភាពអ្វីម្យ៉ាង។
ភ្លាមៗនោះ លោក ញា វិសិទ្ធ យល់ឃើញថា យើងមានកម្លាំងនៅក្នុងរថយន្តស៊ីរ៉ែនបើកតាមពីក្រោយផងដែរ ទំនងជាមិនមានរឿងអ្វីកើតឡើងបានទេ។ តែអ្វីៗមិនដូចការគិតទុកជាមុននោះទេ គ្រាន់តែឡើងអង្គុយនៅក្នុងរថយន្តភ្លាម ឈ្មោះ មឿង ស្រីទូច និងអង្គរក្សបានបញ្ជាឱ្យលោកបិទទូរស័ព្ទមិនឱ្យធ្វើការទាក់ទង (មិនខុសពីក្លាយខ្លួនពីសមត្ថកិច្ចមកជាចំណាប់ខ្មាំងវិញ)។ ហើយពួកគេបានបើករថយន្តក្នុងល្បឿនលឿនដូចហោះសំដៅទៅរាជធានីភ្នំពេញ ធ្វើឱ្យរថយន្តកម្លាំងកងរាជអាវុធហត្ថតាមមិនទាន់។
ដោយមើលឃើញទិដ្ឋភាពមិនអំណោយផល លោកអនុសេនីយ៍ឯក ញា វិសិទ្ធ អនុប្រធានមន្ទីរស្រាវជ្រាវយុត្តិធម៌ នៃទីបញ្ជាការដ្ឋានកងរាជអាវុធហត្ថខេត្តព្រះសីហនុក៏សម្រេចចិត្តបើកទ្វាររថយន្ត រួចលោតចុះទាំងបង្ខំទៅខាងឆ្វេងដៃ បណ្តាលឲ្យរងរបួសដាចស្លឹកត្រចៀកខាងស្តាំស្ទើរបាត់ទាំងស្រុង និងមានស្នាមជាំឈឺចុកចាប់ពេញរាងកាយ។ បន្ទាប់មករថយន្តកម្លាំងកងរាជអាវុធហត្ថខេត្តដែលបើកប្រដេញតាមពីក្រោយបានដឹករូបលោកមកកាន់គ្លីនិកពេទ្យមិត្តភាពឃ្លាំងលើ ដើម្បីជួយសង្គ្រោះ។
ដោយឡែកឈ្មោះ មឿង ស្រីទូច និងអង្គរក្សនៅក្នុងរថយន្តចំនួន ០២នាក់ទៀតបានបើករថយន្តគេចខ្លួនបាត់ដោយសុវត្ថិភាព។ ក្រោយហេតុការណ៍កើតឡើងក៏មានវត្តមាន ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ ចុះសួរសុខទុក្ខ និងពិនិត្យមុខរបួសដល់គ្លីនិក នេះជាការយកចិត្តទុកដាក់ខ្ពស់ និងលើកទឹកចិត្តពីថ្នាក់ដឹកនាំប្រធានគណៈបញ្ជាការឯកភាពខេត្តព្រះសីហនុ។
លុះដល់វេលាម៉ោង ១១យប់ថ្ងៃដដែលទើបកម្លាំងកងរាជអាវុធហត្ថខេត្តស្រាវជ្រាវចាប់បានរថយន្តលុចស៊ីស ៥៧០ ពាក់ស្លាកលេខ ភ្នំពេញ 2AA-3339 ដែលឈ្មោះ មឿង ស្រីទូច និងគូកនបានយកមកលាក់ទុកក្នុងវត្តសមាធិ ស្ថិតក្នុងភូមិស្មាច់ដែង ឃុំរាម ស្រុកព្រៃនប់ ខេត្តព្រះសីហនុ និងឈ្មោះ ណុប ភាន មេខ្លោងខាងគំរាមប្រជាពលរដ្ឋមកបញ្ជាការដ្ឋានកងរាជអាវុធហត្ថខេត្តដើម្បីសួរនាំ។
លោកអនុសេនីយ៍ឯក ញា វិសិទ្ធ បានបញ្ជាក់បន្ថែមថា ជុំវិញហេតុការណ៍ខាងលើថ្នាក់ដឹកនាំនៃទីបញ្ជាការកងរាជអាវុធហត្ថខេត្តព្រះសីហនុ បានដាក់ពាក្យបណ្តឹងទៅអយ្យការអមសាលាដំបូងខេត្តព្រះសីហនុរួចរាល់ហើយ ដើម្បីចាត់ការបន្តទៅតាមនីតិវិធីច្បាប់។
គួរបញ្ជាក់ថា ប្រជាពលរដ្ឋជាច្រើនគ្រួសារកំពុងព្រួយបារម្ភពីការគំរាមកំហែងរបស់គូកនលោក ញាក់ គឹមតុង អ្នកស្រី មឿង ស្រីទូច និងលោក ជៀម ជន់ ដែលកំពុងធ្វើសកម្មភាពទាំងយប់ទាំងថ្ងៃកែនប្រជាពលរដ្ឋដោយខុសច្បាប់ទន្ទ្រានយកដីរបស់ពួកគាត់ (ប្រជាពលរដ្ឋរងគ្រោះ) និងដីគម្របព្រៃឈើរដ្ឋនៅចំណុចពយម៉ាចូវ ស្ថិតក្នុងភូមិសាស្ដ្រឃុំបិតត្រាំង និងឃុំរាម ស្រុកព្រៃនប់ ខេត្តព្រះសីហនុ។
បុគ្គលទាំង ៣នាក់ជាមេកើយដែលប្រជាពលរដ្ឋ និងមន្ត្រីរាជការគ្រប់លំដាប់ថ្នាក់ក្នុងខេត្តព្រះសីហនុ និងអ្នកប្រកបរបរជាអ្នកទិញ-លក់ដីនៅក្នុងខេត្ត និងក្រៅខេត្តឱ្យឈ្មោះថា ជាមនុស្សមានអំណាចផុតលេខខាងដើរបំពានដីមានម្ចាស់ក្នុងភូមិសាស្ត្រភូមិគគីរ ឃុំបិតត្រាំង និងឃុំរាម ស្រុកព្រៃនប់ និងតំបន់មួយចំនួនទៀតក្នុងខេត្តព្រះសីហនុ។
បុគ្គលទាំង ៣នាក់នោះមានឈ្មោះ ទី១: លោក ញាក់ គឹមតុង ជាមេខ្លោងចាយលុយសម្រាប់កែនប្រជាពលរដ្ឋ និងទន្ទ្រានដីព្រៃរដ្ឋ រួមនឹងដីរបស់ប្រជាពលរដ្ឋដែលបានកាន់កាប់ និងអាស្រ័យផលអស់រយៈពេលជាច្រើនឆ្នាំកន្លងមកហើយ ដោយលាក់មុខ។ ទី២: ឈ្មោះ មឿង ស្រីទូច ជាស្ត្រីជើងខ្លាំងខាងជេរប្រមាថ សម្លុត គំរាមកំហែងប្រជាពលរដ្ឋស្លូតត្រង់ និងពេលខ្លះជេរសមត្ថកិច្ចក៏មានដោយគ្មានក្រាញញញើតនឹងច្បាប់បន្តិចសោះឡើយ។ ទី៣: លោក ជៀម ជន់ ជាអ្នកចេញមុខត្រួតពិនិត្យសកម្មភាពទាំងយប់ទាំងថ្ងៃរបស់ក្រុមខ្លួន និងជាអ្នកឃ្លាំមើលផ្លូវក្នុងពេលកំពុងទន្ទ្រានគ្រប់រូបភាពដោយខុសច្បាប់។
ជាក់ស្ដែង កាលពីថ្ងៃទី១៧ ខែឧសភា ឆ្នាំ២០១៨ វេលាម៉ោង ១០:០០នាទីព្រឹក បុគ្គលទាំង ៣នាក់ដែលជាមេខ្លោង (ញាក់ គឹមតុង មឿង ស្រីទូច និង ជៀម ជន់) បានជួលកម្មករប្រមាណ ៤០នាក់មកធ្វើរបងព័ទ្ធទន្ទ្រានយកដីរបស់ប្រជាពលរដ្ឋដែលបានកាន់កាប់ និងអាស្រ័យផលអស់រយៈពេលជាច្រើនឆ្នាំ និងដីព្រៃរដ្ឋដោយបំពានសេចក្តីជូនដំណឹងរបស់រដ្ឋបាលខេត្តព្រះសីហនុលេខ ២៣៨/១៨ សជណ ចុះថ្ងៃសុក្រ ៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែឧសភា ឆ្នាំ២០១៨។
គួររម្លឹកថា រដ្ឋបាលខេត្តព្រះសីហនុបានចេញលិខិតមួយច្បាប់លេខ ២៣៨/១៨ សជណ ចុះថ្ងៃសុក្រ ៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែឧសភា ឆ្នាំ២០១៨ ជម្រាបមក លោកអភិបាលស្រុកព្រៃនប់ រួមនឹងលោកមេឃុំបិតត្រាំង និងលោកមេឃុំរាម ស្តីពីការទប់ស្កាត់ការចូលទន្ទ្រាន កាន់កាប់គ្រប់រូបភាពលើដីសាធារណៈរបស់រដ្ឋនៅតំបន់ពយម៉ាចូវ ស្ថិតនៅភូមិគគីរ ឃុំបិតត្រាំង និងតំបន់បឹងកង្កែប ស្ថិតក្នុងភូមិអុង ឃុំរាម នៃភូមិសាស្ដ្រ ស្រុកព្រៃនប់ ខេត្តព្រះសីហនុ។ ដោយតំបន់នេះ ត្រូវបានរាជរដ្ឋាភិបាលបានអនុញ្ញាតជាគោលការណ៍ ដើម្បីសិក្សាស្រាវជ្រាវ រៀបចំតំបន់អភិវឌ្ឍន៍ទេសចរណ៍ “គម្រោងទេសចរណ៍នាគរាជ” នៅក្នុងភូមិសាស្ត្រស្រុកព្រៃនប់ ខេត្តព្រះសីហនុ។
ប្រជាពលរដ្ឋក៏ដូចជាមន្ត្រីរាជការក្នុងខេត្តរងចាំមើល ចំណាត់ការរបស់អាជ្ញាធរខេត្តយ៉ាងណាចំពោះបុគ្គលទាំង ៣នាក់នេះដែលបង្កចលាចលកំពុងធ្វើសកម្មភាពទាំងយប់ទាំងថ្ងៃកែនប្រជាពលរដ្ឋដោយខុសច្បាប់ទន្ទ្រានយកដីរបស់ពួកគាត់ (ប្រជាពលរដ្ឋរងគ្រោះ) និងដីគម្របព្រៃឈើរដ្ឋនៅចំណុចពយម៉ាចូវ ស្ថិតក្នុងភូមិសាស្ដ្រឃុំបិតត្រាំង និងឃុំរាម ស្រុកព្រៃនប់ ខេត្តព្រះសីហនុ ដើម្បីបម្រើផលប្រយោជន៍បក្ខពួកខ្លួន។
ទាក់ទងនឹងបញ្ហាខាងលើនេះ “ពុទ្ធិខ្មែរ” មិនអាចសុំការបំភ្លឺពីឈ្មោះបុគ្គលទាំង ៣នាក់ខាងលើនេះបានទេ ដោយពុំមាន លេខទូរស័ព្ទទាក់ទង ៕
