ខេត្តកំពត-ដោយ: សុភ័ក្ត្រ
ឯកឧត្តម ហ៊ុន សុខា ជំនួយការផ្ទាល់ ឯកឧត្តម នាយឧត្តមសេនីយ៍ ជា តារា សាកលវិទ្យាធិការ នៃសាកលវិទ្យាល័យការពារជាតិ និងជាអនុប្រធានក្រុមការងារយុវជនគណបក្សប្រជាជនកម្ពុជាខេត្តកំពតអញ្ជើញចួបសំណេះសំណាលជាមួយប្រជាការពារ និងប្រជាពលរដ្ឋឃុំបឹងទូក ស្រុកទឹកឈូ ខេត្តកំពត ប្រមាណជាង ២០០នាក់។
ក្នុងពិធីសំណេះសំណាលនេះ មានវត្តមានអញ្ជើញចូលរួមពីសំណាក់លោក អ៊ឹម ច័ន្ទសោធន អភិបាលនៃគណៈអភិបាលរងស្រុកទឹកឈូ លោកស្រីមេឃុំ លោកនាយប៉ុស្តិ៍នគរបាល និងប្រធានក្រុមការងារបក្សឃុំ ប្រធានក្រុមការងារយុវជនគណបក្សប្រជាជនកម្ពុជាឃុំ-ភូមិជាច្រើនរូបផងដែរ។ ពិធីនេះ បានធ្វើឡើងនៅវេលាម៉ោង ០៨:៣០នាទីព្រឹក ថ្ងៃសៅរ៍ ១២កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៦ ខែឧសភា ឆ្នាំ២០១៨ នៅភូមិទទឹងថ្ងៃ ឃុំបឹងទូក ស្រុកទឹកឈូ ខេត្តកំពត។
ឯកឧត្តម ហ៊ុន សុខា អនុប្រធានក្រុមការងារយុវជនគណបក្សប្រជាជនកម្ពុជាខេត្តកំពត បានមានមតិសំណេះសំណាល និងសាកសួរសុខទុក្ខដល់បងប្អូនប្រជាការពារ និងប្រជាពលរដ្ឋដែលបានចំណាយពេលវេលាដ៏មានតម្លៃមកចួបជុំគ្នានាព្រឹកនេះ។
ឯកឧត្តម ហ៊ុន សុខា បានសំដែងនូវការកោតសរសើរចំពោះបងប្អូនប្រជាការពារដែលបានចំណាយពេលវេលា និងកម្លាំងកាយចិត្តបម្រើបងប្អូនប្រជាពលរដ្ឋ ពោលគឺប្រជាការពារគឺកម្លាំងការពារសន្តិសុខស្ម័គ្រចិត្តនៅថ្នាក់មូលដ្ឋាន ដែលបំពេញការងារដើម្បីសុវត្ថិភាពប្រជាពលរដ្ឋ។ កម្លាំងប្រជាការពារពិតជាដើរតួនាទីសំខាន់មួយសម្រាប់សុខសុវត្ថិភាពប្រជាពលរដ្ឋ លើសពីនេះ កងប្រជាការពារគឺជាអ្នកធ្វើការដោយគ្មានប្រាក់ខែឡើយ។
ក្នុងឱកាសចួបជុំប្រកបដោយភាពស្និទ្ធស្នាលនេះដែរ ឯកឧត្តមអនុប្រធានក្រុមការងារយុវជនគណបក្សប្រជាជនកម្ពុជាខេត្តកំពត បានរម្លឹកប្រវត្តិដ៏ជូរចត់ចាប់តាំងពីឆ្នាំ១៩៧០ មកដល់សព្វថ្ងៃនេះ ដែលប្រទេសកម្ពុជាត្រូវបានញ៉ាំញីដោយសារសង្គ្រាមរាប់ទសវត្សរ៍បានសម្លាប់មនុស្សរាប់លាននាក់រុញច្រានប្រទេសឱ្យធ្លាក់ក្នុងសភាពរស់មិនដូចរស់ ស្លាប់មិនដូចស្លាប់។ តែដោយសារ ការលះបង់សាច់ស្រស់ឈាមស្រស់ យកជីវិតប្តូរសន្តិភាពរបស់ថ្នាក់នាំគណបក្សប្រជាជនកម្ពុជា ពិសេសសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានរំដោះ និងសង្គ្រោះប្រជាជន ព្រមទាំងបន្តដឹកនាំនាវាកម្ពុជាបានរីកចម្រើនលើគ្រប់វិស័យដូចបច្ចុប្បន្ននេះ។
ឯកឧត្តម ហ៊ុន សុខា បានគូសបញ្ជាក់ទៀតថា នៅក្នុងរយៈពេលជាង ៣៤ឆ្នាំមកនេះក្រោមការដឹកនាំរបស់គណបក្សប្រជាជនកម្ពុជា ដែលមានសម្តេចអគ្គមហាទាំង៣ ជាមគ្គុទ្ទេសក៏បានអនុវត្តគោលនយោបាយបង្រួបបង្រួមជាតិ បញ្ចប់សង្គ្រាម ផ្សះផ្សាជាតិ តាមរយៈគោលនយោបាយឈ្នះៗ ហើយរាល់ហេដ្ឋារចនាសម្ព័ន្ធរូបវន្តត្រូវបានធ្វើការអភិវឌ្ឍន៍លើគ្រប់វិស័យ។
ឯកឧត្តម ហ៊ុន សុខា អនុប្រធានក្រុមការងារយុវជនគណបក្សប្រជាជនកម្ពុជាខេត្តកំពតក៏បានអំពាវនាវដល់បងប្អូនប្រជាពលរដ្ឋ និងប្រជាការពារទាំងអស់ក្នុងឃុំបឹងទូកនេះដែលបងប្អូនទាំងអស់គ្នាជាសមាជិកគណបក្សប្រជាជនកម្ពុជា ត្រូវត្រៀមគ្រប់មធ្យោបាយ អត្តសញ្ញាណប័ណ្ណ និងលិខិតស្នាមពាក់ព័ន្ធការបោះឆ្នោតអញ្ជើញទៅចូលរួមបោះឆ្នោតជ្រើសតាំងតំណាងរាស្ត្រ នីតិកាលទី៦ នៃរដ្ឋសភា ឆ្នាំ២០១៨ ដែលនឹងប្រព្រឹត្តទៅនៅ ថ្ងៃអាទិត្យ ទី២៩ ខែកក្កដា ឆ្នាំ២០១៨ ខាងមុខនេះឱ្យបានគ្រប់ៗគ្នាសំដៅបន្តគាំទ្របេក្ខភាពសម្តេចតេជោ ហ៊ុន សែន ធ្វើជានាយករដ្ឋមន្ត្រីនៅអាណត្តិទី៦ និងអាណត្តិបន្តបន្ទាប់ទៀត ដើម្បីបន្តដឹកនាំនាវាកម្ពុជាដ៏កម្សត់មួយនេះឆ្ពោះទៅរកការអភិវឌ្ឍន៍លើគ្រប់វិស័យ រួមនឹងសុខសន្តិភាពជូនមហាគ្រួសារខ្មែរគ្រប់ជំនាន់ជាដរាប។
មុននឹងបញ្ចប់កម្មវិធី ឯកឧត្តម ហ៊ុន សុខា អនុប្រធានក្រុមការងារយុវជនគណបក្សប្រជាជនកម្ពុជាខេត្តកំពត បាននាំមកជាមួយនូវវត្ថុអនុស្សាវរីយ៍ជូនបងប្អូនប្រជាការពារ និងប្រជាពលរដ្ឋ ចំនួន ២១០នាក់ នូវក្រមាចំនួនម្នាក់មួយ រួមនឹងថវិកាចំនួន ១០០.០០០៛ (ដប់ពាន់រៀល) ក្នុងមួយនាក់។ ក្នុងនោះបានឧបត្ថម្ភជូនឃុំបឹងទូកថវិកាចំនួន ១០០.០០០៛ (មួយសែនរៀល) និងកម្លាំងនគរបាលប៉ុស្តិ៍ ថវិកាចំនួន ១០០.០០០៛ (មួយសែនរៀល)។ ចំពោះ បងប្អូនប្រជាការពារ ចំនួន ៤០នាក់ ក្នុងម្នាក់ទទួលបានឯកសណ្ឋានប្រជាការពារមួយសម្រាប់ និងមួកមួយបន្ថែមទៀត។
ជាមួយគ្នានេះ លោកអភិបាលនៃគណៈអភិបាលស្រុកទឹកឈូ បានឧបត្ថម្ភថវិកាចំនួន ៤០០.០០០៛ (បួនសែនរៀល) ជូនដល់កម្លាំងប្រជាការពារទាំង ៤០នាក់ផងដែរ។
