រាជធានីភ្នំពេញ-ដោយ: សុភ័ក្ត្រ
ឯកឧត្តម ហ៊ុន ម៉ាណែត បានថ្លែងថា យើងមានជំនាញ និងមានបេះដូង យើងត្រូវអនុវត្តជំនាញនឹងយកបេះដូងជួយដល់ប្រជាពលរដ្ឋ ព្រោះថា ការពិនិត្យព្យាបាលដោយឥតគិតថ្លៃជូនប្រជាពលរដ្ឋ គឺមិនត្រឹមតែជួយសង្គ្រោះជីវិតអ្នកជំងឺប៉ុណ្ណោះទេ យើងបានផ្ដល់នូវស្នាមញញឹម ក្តីសង្ឃឹម និងសុភមង្គលដល់គ្រួសារផងដែរ។
ការថ្លែងបែបនេះ របស់ឯកឧត្តម ហ៊ុន ម៉ាណែត បានធ្វើឡើងក្នុងពិធីចុះអនុស្សរណៈយោគយល់គ្នារវាងសមាគមគ្រូពេទ្យស្ម័គ្រចិត្តយុវជនសម្តេចតេជោ និងមូលនិធិសាសនាឆឺជី ដើម្បីបង្កើនលទ្ធភាពក្នុងសកម្មភាពមនុស្សធម៌ជួយដល់ប្រជាពលរដ្ឋតាមរយៈការព្យាបាលដោយឥតគិតថ្លៃជូនប្រជាពលរដ្ឋតាមបណ្ដាខេត្ត រោងចក្រ សហគមន៍ អង្គការ មជ្ឈមណ្ឌលកុមារកំព្រា។ ពិធីចុះអនុស្សរណៈយោគយល់គ្នានេះបានធ្វើឡើងនៅរសៀលថ្ងៃទី២៤ ខែឧសភា ឆ្នាំ២០១៨។
លោកវេជ្ជបណ្ឌិត Dr.Lin Chin long បានលើកឡើងថាមូលនិធិសាសនាឆឺជី គឺជាអង្គការមនុស្សធម៌មួយដែលបានបង្កើតឡើងក្នុងសកម្មភាពសំខាន់ៗចំនួន ៤ ក្នុងនោះមានសកម្មភាពមនុស្សធម៌ វេជ្ជសាស្ត្រ អប់រំ និងវប្បធម៌ ក្នុងគោលបំណងជួយទៅដល់ប្រជាជនឲ្យមានភាពសប្បាយរីករាយនៅក្នុងជីវិត។ គិតមកដល់ពេលនេះអង្គការបានធ្វើសកម្មភាពជួយដល់ប្រជាជនចំនួន ៥៤ប្រទេសរួចមកហើយ។ ដោយមើលឃើញអំពីសកម្មភាពមនុស្សធម៌ដ៏ល្អប្រពៃរបស់សមាគមគ្រូពេទ្យស្ម័គ្រចិត្តយុវជនសម្តេចតេជោ និងដោយសារមានគោលបំណងដូចគ្នា អង្គការបានចុះអនុស្សរណៈយោគយល់គ្នារវាងស្ថាប័នទាំងពីរដើម្បីចូលរួមចំណែកនៅក្នុងសកម្មភាពមនុស្សធម៌ដើម្បីជួយដល់ប្រជាជននៅក្នុងប្រទេសកម្ពុជា។
នៅក្នុងឱកាសនោះ ឯកឧត្តម ហ៊ុន ម៉ាណែត បានលើកឡើងថា ក្នុងនាមប្រជាជនកម្ពុជា សូមថ្លែងអំណរគុណចំពោះថ្នាក់ដឹកនាំមូលនិធិសាសនាឆឺជី ដែលបានចូលរួមសកម្មភាពមនុស្សធម៌ជាមួយសមាគមគ្រូពេទ្យស្ម័គ្រចិត្តយុវជនសម្ដេចតេជោ តាមរយៈការផ្តល់សេវាពិនិត្យ និងព្យាបាលដោយឥតគិតថ្លៃជូនប្រជាពលរដ្ឋ។ ឯកឧត្តម ហ៊ុន ម៉ាណែត បានបន្តថា តាមរយៈការចុះអនុស្សារណៈយោគយល់គ្នានេះយើងនឹងបន្តការទំនាក់ទំនង និងឱកាសបន្ថែមទៀតដើម្បីធ្វើការរួមគ្នាជួយដល់ប្រជាពលរដ្ឋ។
សូមបញ្ជាក់ថា សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ពីមួយថ្ងៃទៅមួយថ្ងៃបានពង្រីកសកម្មភាពមនុស្សធម៌របស់ខ្លួនទៅតាមលទ្ធភាពដោយមានការចូលរួមពីសប្បុរសជន និងស្ថាប័នមនុស្សធម៌ផ្សេងៗដើម្បីចុះពិនិត្យនិងព្យាបាលប្រជាពលរដ្ឋដោយឥតគិតថ្លៃនៅតាមបណ្តាខេត្តនានា តាមបណ្តារោងចក្រ សហគមន៍ អង្គការកុមារកំព្រាជាច្រើននៅទូទាំងប្រទេស។
ជាលទ្ធផលសមាគមបានពិនិត្យ និងព្យាបាលប្រជាពលរដ្ឋបានជិត ៣០ម៉ឺននាក់នៅទូទាំងប្រទេស និងករណីអ្នកជំងឺធ្ងនធ្ងរជាង ៣ពាន់នាក់ត្រូវបាននាំមកព្យាបាល និងវះកាត់នៅរាជធានីភ្នំពេញ ក្រោមការឧបត្ថម្ភទាំងស្រុងរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត តាមរយៈ ឯកឧត្តម ហ៊ុន ម៉ាណែត និងលោកជំទាវ ពេជ ចន្ទមុន្នី ប្រធានក្រុមប្រឹក្សាភិបាលសមាគម TYDA។
