រាជធានីភ្នំពេញ-ដោយ: សុភ័ក្ត្រ
លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច រួមជាមួយលោកឧកញ៉ា ផែ ហ៊ុនឈួន និងលោកជំទាវឧកញ៉ា អ៊ឹង ស៊ីស្រ៊ន ក៏ដូចជាពុទ្ធសាសនិកដទៃទៀតបានចូលរួមវេរទេយ្យវត្ថុ និងទៀនព្រះវស្សាដល់វត្តចំនួន ៣៣ ក្នុងនោះវត្តនៅរាជធានីភ្នំពេញចំនួន ៧ និងវត្តនៅស្រុកស្ទោង ខេត្តកំពង់ធំ ចំនួន ២៦វត្ត ផងដែរ។
ពិធីវេរទេយ្យវត្ថុ និងទៀនព្រះវស្សា បានធ្វើឡើងនារសៀលថ្ងៃព្រហស្បតិ៍ ១០កើត ខែជេស្ឋ ឆ្នាំច សំរិទ្ធិស័ក ព.ស.២៥៦២ ត្រូវនឹងថ្ងៃទី២៤ ខែឧសភា ឆ្នាំ២០១៨ នៅភោជនីយដ្ឋានសូរិយា ស្ថិតក្នុងសង្កាត់ផ្សារថ្មី២ ខណ្ឌដូនពេញ រាជធានីភ្នំពេញ។
សូមរម្លឹកថា ការចូលព្រះវស្សាគឺជាព្រះវិន័យដែលព្រះសម្មាសម្ពុទ្ធទ្រង់បញ្ញត្តិឡើង ដើម្បីឲ្យព្រះសង្ឃសាវ័កគ្រប់អង្គប្រតិបត្តិតាម ដែលមានរយៈពេល ៣ខែ ពោលគឺចាប់ពីថ្ងៃ ១រោច ខែអាសាឍ ដល់ ថ្ងៃ ១៥កើត ខែអស្សុជ។
ពុទ្ធប្បញ្ញត្តិឱ្យមានការកាន់ព្រះវស្សា គឺព្រះពុទ្ធជាម្ចាស់ទ្រង់មានព្រះបំណងចង់ឱ្យព្រះសង្ឃមានភាពងាយស្រួលក្នុងរដូវវស្សារយៈពេលខែនេះ ដែលជារដូវពោរពេញទៅដោយភ្លៀងធ្លាក់ជោគជាំ សម្បូរភក់ជ្រាំច្រើន។
តាមទម្លាប់ពុទ្ធបរិស័ទតែងតែនាំយកនូវទេយ្យទាន ដូចជា អង្ករ ទៀន ធូប ប្រេង ស្បង់ ចីវរ សំពត់ស្លាដក និងគ្រឿងសម្ភារៈដដៃទៀត ទៅប្រគេនព្រះសង្ឃតាមវត្តអារាម ដើម្បីផ្គត់ផ្គង់ព្រះអង្គក្នុងកំឡុងពេលនៃការចូលព្រះវស្សានេះ។ តែទោះបីជាយ៉ាងណាក៏ដោយ ទម្លាប់នៃការចូលព្រះវស្សាក្នុងព្រះរាជាណាចក្រកម្ពុជាព្រះសង្ឃខ្មែរយើងនៅតែចួបផលលំបាកមួយចំនួនដែលគ្រហស្ថមិនបានដឹង។
សូមបញ្ជាក់ថា ទំនៀមបូជាទៀនវស្សាគឺជាផ្នែកមួយនៃក្តីគោរពរបស់ពុទ្ធបរិស័ទ ដើម្បីរម្លឹកនឹកដល់គុណូបការៈនៃព្រះសម្មាសម្ពុទ្ធសមណគោតម ដោយបូជានូវគ្រឿងសក្ការៈ មានប្រទីប ទៀន ធូប និងផ្កាភ្ញីជាដើម។
