រាជធានីភ្នំពេញ-ដោយ: សុភ័ក្ត្រ
ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា និងឯកឧត្តម ហូរីណូអ៊ូជិ ហ៊ីដេហ៊ីសា (HORONOUCHI Hidehisa) ឯកអគ្គរាជទូតជប៉ុនប្រចាំកម្ពុជា បានចុះហត្ថលេខាលើលិខិតប្តូរសារ និងកំណត់ហេតុនៃការពិភាក្សាស្តីពីការផ្តល់ហិរញ្ញប្បទានឥតសំណង ដែលមានទឹកប្រាក់សរុបចំនួន ៣៤២លានយ៉េន (ប្រមាណ ៣.២២ លានដុល្លារអាមេរិក) សម្រាប់អនុវត្តគម្រោង “អាហាររូបករណ៍អភិវឌ្ឍន៍ធនធានមនុស្ស” សម្រាប់ឆ្នាំសិក្សា ២០១៨។
ពិធីចុះហត្ថលេខាផ្តល់ហិរញ្ញប្បទានឥតសំណងរវាងព្រះរាជាណាចក្រកម្ពុជា និងប្រទេសជប៉ុន បានធ្វើឡើងនាថ្ងៃអង្គារ ៨កើត ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២២ ខែឧសភា ឆ្នាំ២០១៨ វេលាម៉ោង ០៩:០០នាទីព្រឹកនៅទីស្តីការក្រសួងការបរទេស និងសហប្រតិបត្តិការអន្តរជាតិ។
ថ្លែងក្នុងឱកាសនោះដែរ ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានគូសបញ្ជាក់ថា អាហារូបករណ៍នេះនឹងផ្ដល់ជូននិស្សិតដែលជាមន្ត្រីរាជការវ័យក្មេងរបស់កម្ពុជាចំនួន ២៦នាក់។ ក្នុងនោះ សម្រាប់ថ្នាក់បរិញ្ញាបត្រជាន់ខ្ពស់ (ថ្នាក់អនុបណ្ឌិត)ចំនួន ២៤នាក់ សិក្សារយៈពេល ២ឆ្នាំ និងថ្នាក់បណ្ឌិត ចំនួន ០២នាក់ សិក្សារយៈពេល ៣ឆ្នាំ។ ជាមួយគ្នានេះ និស្សិតចំនួន ២៤នាក់ មានស្ត្រីចំនួន ១៣នាក់នឹងបានចេញដំណើរទៅសិក្សានៅប្រទេសជប៉ុនក្នុងខែសីហា ឆ្នាំ២០១៨ នាពេលខាងមុខនេះ។
ឯកឧត្តម ទេសរដ្ឋមន្ត្រី បានបន្តថា រដ្ឋាភិបាលជប៉ុនបានផ្តល់ហិរញ្ញប្បទានឥតសំណងសម្រាប់អភិវឌ្ឍន៍ធនធានមនុស្សនៅកម្ពុជាមានរយៈពេល ១៨ឆ្នាំមកហើយ គឺចាប់ពីឆ្នាំ២០០០មក ដែលមានទំហំទឹកប្រាក់សរុបចំនួន ៥.៨៥៧លានយ៉េន (ប្រមាណ ៥៨.៧៧លានដុល្លារអាមេរិក)។
ឯកឧត្តម ទេសរដ្ឋមន្ត្រី បានបញ្ជាក់បន្ថែមថា តាមរយៈជំនួយនេះ មន្ត្រីរាជការវ័យក្មេងកម្ពុជាចំនួន ៤១៦នាក់ (ក្នុងនោះមានស្ត្រី ៩៣នាក់) ដែលបានទៅបន្តការសិក្សាថ្នាក់បរិញ្ញាបត្រជាន់ខ្ពស់ (Master) នៅប្រទេសជប៉ុន លើមុខវិជ្ជាពាក់ព័ន្ធនឹងសេដ្ឋកិច្ច ការលើកកម្ពស់ការអភិវឌ្ឍន៍សង្គម និងការលើកកម្ពស់អភិបាលកិច្ចល្អ។ គិតមកដល់បច្ចុប្បន្ននេះនិស្សិតដែលបានបញ្ចប់ការសិក្សានៅប្រទេសជប៉ុនតាមរយៈជំនួយខាងលើនេះ សរុបមានចំនួន ៣៤៤នាក់ ក្នុងមានស្ត្រី ៦៨នាក់ហើយបានកំពុងបម្រើការងារនៅតាមក្រសួង-ស្ថាប័នសំខាន់ៗក្នុងការចូលរួមចំណែកយ៉ាងសកម្មក្នុងការអភិវឌ្ឍន៍ធនធានមនុស្សនៅកម្ពុជា។
ឆ្លៀតក្នុងឱកាសនោះដែរ ឯកឧត្តម ប្រាក់ សុខុន ទេសរដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិកម្ពុជា បានថ្លែងអំណរគុណយ៉ាងជ្រាលជ្រៅបំផុតដល់រាជរដ្ឋាភិបាលជប៉ុនដែលបានខិតខំយ៉ាងសកម្មក្នុងការជំរុញ និងការអភិវឌ្ឍន៍នៅកម្ពុជារួមនឹងលើកកម្ពស់ទំនាក់ទំនងមិត្តភាព និងសហប្រតិបត្តិការលើគ្រប់វិស័យរវាងប្រទេសជប៉ុន និងព្រះរាជាណាចក្រកម្ពុជា។
