ខេត្តព្រះសីហនុ-ដោយ: សុភ័ក្ត្រ
ប្រជាពលរដ្ឋជាច្រើនគ្រួសារកំពុងព្រួយបារម្ភពីការគំរាមកំហែងពីសំណាក់គូកនរបស់លោក ញាក់ គឹមតុង និងលោក ជៀម ជន់ ដែលកំពុងធ្វើសកម្មភាពទាំងយប់ទាំងថ្ងៃ
កែនប្រជាពលរដ្ឋដោយខុសច្បាប់ទន្ទ្រានយកដីរបស់ពួកគាត់ (ប្រជាពលរដ្ឋរងគ្រោះ) និងដីគម្របព្រៃឈើរដ្ឋនៅចំណុចពយម៉ាចូវ ស្ថិតក្នុងភូមិសាស្ដ្រឃុំបិតត្រាំង និងឃុំរាម ស្រុកព្រៃនប់ ខេត្តព្រះសីហនុ។
បន្ទាប់ពីមានសេចក្តីរាយការណ៍របស់ប្រជាពលរដ្ឋ នាថ្ងៃទី ១៧ ខែឧសភា ឆ្នាំ២០១៨ បានឱ្យ “ពុទ្ធិខ្មែរ” ដឹងថា មានបុគ្គល ៣នាក់ដែលប្រជាពលរដ្ឋ និងមន្ត្រីរាជការគ្រប់លំដាប់ថ្នាក់ក្នុងខេត្តព្រះសីហនុ និងអ្នកប្រកបរបរជាអ្នកទិញ-លក់ដីនៅក្នុងខេត្ត និងក្រៅខេត្តឱ្យឈ្មោះថា ជាមនុស្សមានអំណាចផុតលេខខាងដើរបំពានដីមានម្ចាស់ក្នុងភូមិសាស្ត្រភូមិគគីរ ឃុំបិតត្រាំង និងឃុំរាម ស្រុកព្រៃនប់ និងតំបន់មួយចំនួនទៀតក្នុងខេត្តព្រះសីហនុ។
សេចក្តីរាយការណ៍ដដែលបន្តថា បុគ្គលទាំង ៣នាក់នោះមានឈ្មោះ ទី១: លោក ញាក់ គឹមតុង ជាមេខ្លោងខាងកែនប្រជាពលរដ្ឋ និងទន្ទ្រានដីព្រៃរដ្ឋ រួមនឹងដីរបស់ប្រជាពលរដ្ឋដែលបានកាន់កាប់ និងអាស្រ័យផលអស់រយៈពេលជាច្រើនឆ្នាំកន្លងមកហើយ ដោយលាក់មុខ។ ទី២: ឈ្មោះ មឿង ស្រីទូច ជាស្ត្រីជើងខ្លាំងខាងជេរប្រមាថ សម្លុត គំរាមកំហែងប្រជាពលរដ្ឋស្លូតត្រង់ និងពេលខ្លះជេរសមត្ថកិច្ចក៏មានដោយគ្មានក្រាញញញើតនឹងច្បាប់បន្តិចសោះឡើយ។ ទី៣: លោក ជៀម ជន់ ជាអ្នកចេញមុខត្រួតពិនិត្យសកម្មភាពទាំងយប់ទាំងថ្ងៃរបស់ក្រុមខ្លួន និងជាអ្នកឃ្លាំមើលផ្លូវក្នុងពេលកំពុងទន្ទ្រានគ្រប់រូបភាពដោយខុសច្បាប់។
ជាក់ស្ដែង កាលពីថ្ងៃទី១៧ ខែឧសភា ឆ្នាំ២០១៨ វេលាម៉ោង ១០:០០នាទីព្រឹក បុគ្គលទាំង ៣នាក់ដែលជាមេខ្លោង (ញាក់ គឹមតុង មឿង ស្រីទូច និង ជៀម ជន់) បានជួលកម្មករប្រមាណ ៤០នាក់មកធ្វើរបងព័ទ្ធទន្ទ្រានយកដីរបស់ប្រជាពលរដ្ឋដែលបានកាន់កាប់ និងអាស្រ័យផលអស់រយៈពេលជាច្រើនឆ្នាំ និងដីព្រៃរដ្ឋដោយបំពានសេចក្តីជូនដំណឹងរបស់រដ្ឋបាលខេត្តព្រះសីហនុលេខ ២៣៨/១៨ សជណ ចុះថ្ងៃសុក្រ ៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែឧសភា ឆ្នាំ២០១៨។
ភ្លាមៗនោះ ដោយមើលឃើញទិដ្ឋភាពដូចនេះប្រជាពលរដ្ឋបានរាយការណ៍ជូន ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុរួចមក ទើបឃើញមានក្រុមការងារចុះទប់ស្កាត់ការទន្ទ្រានដីរដ្ឋចុះមកមើលប្រហែលជា ១០នាទី ដោយខ្លាចអំណាច ញាក់ គឹមតុង មឿង ស្រីទូច ជៀម ជន់ ក៏ចាកចេញទៅដោយមិនអនុវត្តភារកិច្ចរបស់ខ្លួនឡើយ។
ដោយឃើញសកម្មភាពដូច្នេះ ប្រជាពលរដ្ឋមិនអស់ចិត្តក៏បានរាយការណ៍ម្តងទៀតជូន ឯកឧត្តមអភិបាលខេត្ត ទើបនៅវេលាម៉ោង ០៧:៥០នាទីយប់ក្នុងថ្ងៃដដែល មានវត្ត ឯកឧត្តម ស្រ៊ុន ស្រ៊ន់ អភិបាលរងខេត្តដឹកនាំកំម្លាំងចម្រុះ តាមការចង្អុលបង្ហាញរបស់ ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ ចុះទៅដល់កន្លែងផ្ទាល់ពេលនោះគេឃើញបុរសខ្លាំង ញាក់ គឹមតុង ជៀម ជន់ រត់គេចខ្លួនបាត់ ហើយ មឿន ស្រីទូច ដែលអួតខ្លួនប្រាប់គេថាជាក្មួយ ឯកឧត្តម សេង ទៀង ក៏ស្រែកដាក់សមត្ថកិច្ចដោយមិនខ្លាចច្បាប់ឡើយ។ ស្ដ្រីឈ្មោះ មឿង ស្រីទូច នេះបានធ្វើឱ្យកម្លាំងសមត្ថកិច្ចខឹងសម្បាយ៉ាងខ្លាំង តែប្រហែលជាមានអ្នកអន្តរាគមន៍ ទើបអាជ្ញាធរមិនចាត់ការបុគ្គលនោះ ហើយបានឱ្យកងកម្លាំងចម្រុះវាយកំទេចរបងដែលគូកន ញាក់ គឹមតុង បានលួចទន្ទ្រានយកនោះចោលអស់។
ប្រជាពលរដ្ឋដែលបានឃើញហេតុការណ៍ និងប្រជាពលរដ្ឋរងគ្រោះបានអបអរសាទរចំពោះចំណាត់ការទាន់ពេលរបស់រដ្ឋបាលខេត្តព្រះសីហនុ។ ប្រជាពលរដ្ឋរងគ្រោះ សូមសុំណូមពរឱ្យអាជ្ញាធរខេត្តត្រូវនាំយកជនប្រព្រិត្តិនេះមកផ្តន្ទាទោសផង។ ព្រោះបុគ្គលទាំង ៣នាក់ នេះត្រូវបានខណ្ឌរដ្ឋបាលព្រៃឈើខេត្តបានដាក់ពាក្យបណ្តឹងទៅស្ថាប័នអយ្យការអមសាលាដំបូងខេត្តព្រះសីហនុរួចរាល់ហើយកាលពីខែមេសា ឆ្នាំ២០១៨ តែពុំទាន់ឃើញមានចំណាត់ការនៅឡើយនោះទេ។
ប្រជាពលរដ្ឋក៏ដូចជាមន្ត្រីរាជការក្នុងខេត្តរងចាំមើល ចំណាត់ការរបស់អាជ្ញាធរខេត្តយ៉ាងណាចំពោះបុគ្គលទាំង ៣នាក់នេះដែលបង្កចលាចលកំពុងធ្វើសកម្មភាពទាំងយប់ទាំងថ្ងៃកែនប្រជាពលរដ្ឋដោយខុសច្បាប់ទន្ទ្រានយកដីរបស់ពួកគាត់ (ប្រជាពលរដ្ឋរងគ្រោះ) និងដីគម្របព្រៃឈើរដ្ឋនៅចំណុចពយម៉ាចូវ ស្ថិតក្នុងភូមិសាស្ដ្រឃុំបិតត្រាំង និងឃុំរាម ស្រុកព្រៃនប់ ខេត្តព្រះសីហនុ ដើម្បីបម្រើផលប្រយោជន៍បក្ខពួកខ្លួន។
គួររម្លឹកថា រដ្ឋបាលខេត្តព្រះសីហនុបានចេញលិខិតមួយច្បាប់លេខ ២៣៨/១៨ សជណ ចុះថ្ងៃសុក្រ ៥រោច ខែពិសាខ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៤ ខែឧសភា ឆ្នាំ២០១៨ ជម្រាបមក លោកអភិបាលស្រុកព្រៃនប់ រួមនឹងលោកមេឃុំបិតត្រាំង និងលោកមេឃុំរាម ស្តីពីការទប់ស្កាត់ការចូលទន្ទ្រាន កាន់កាប់គ្រប់រូបភាពលើដីសាធារណៈរបស់រដ្ឋនៅតំបន់ពយម៉ាចូវ ស្ថិតនៅភូមិគគីរ ឃុំបិតត្រាំង និងតំបន់បឹងកង្កែប ស្ថិតក្នុងភូមិអុង ឃុំរាម នៃភូមិសាស្ដ្រ ស្រុកព្រៃនប់ ខេត្តព្រះសីហនុ។ ដោយតំបន់នេះ ត្រូវបានរាជរដ្ឋាភិបាលបានអនុញ្ញាតជាគោលការណ៍ ដើម្បីសិក្សាស្រាវជ្រាវ រៀបចំតំបន់អភិវឌ្ឍន៍ទេសចរណ៍ “គម្រោងទេសចរណ៍នាគរាជ” នៅក្នុងភូមិសាស្ត្រស្រុកព្រៃនប់ ខេត្តព្រះសីហនុ។
ទាក់ទងនឹងបញ្ហាខាងលើនេះ “ពុទ្ធិខ្មែរ” មិនអាចសុំការបំភ្លឺពីឈ្មោះបុគ្គលទាំង ៣នាក់ខាងលើនេះបានទេ ដោយពុំមាន លេខទូរស័ព្ទទាក់ទង។ “ពុទ្ធិខ្មែរ” រង់ចាំការបកស្រាយពីឈ្មោះ ញាក់ គឹមតុង មឿង ស្រីទូច និង ជៀម ជន់ រៀងរាល់ម៉ោងធ្វើការ។
