រាជធានីភ្នំពេញ-ដោយ: សុភ័ក្ត្រ
ក្នុងគោលដៅលើកកម្ពស់ការផ្តល់សេវាលិខិតឆ្លងដែនធម្មតាជូនប្រជាពលរដ្ឋឱ្យកាន់តែមានប្រសិទ្ធភាព និងឆាប់រហ័ស រាជរដ្ឋាភិបាល នៃព្រះរាជាណាចក្រកម្ពុជា បានសម្រេចដាក់ឱ្យដំណើរការសាខាផ្តល់សេវាលិខិតឆ្លងដែនធម្មតាគំរូថ្មីនៅតាមខេត្តចំនួន ០៣ទៀត និងកែប្រែរយៈពេលនៃការផ្តល់សេវាលិខិតឆ្លងដែនធម្មតាគំរូថ្មី ដែលនឹងចាប់ផ្តើមដាក់ឱ្យអនុវត្តចាប់ពីថ្ងៃពុធ ៨រោច ខែជេស្ឋ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៦ ខែមិថុនា ឆ្នាំ២០១៨ នេះតទៅ។ នេះបើយោងតាម សេចក្តីជូនដំណឹង របស់អគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ ចុះថ្ងៃទី១៧ ខែឧសភា ឆ្នាំ២០១៨។
ក្នុងសេចក្តីជូនដំណឹងដដែល បានឲ្យដឹងទៀតថា អាសយដ្ឋានសាខាផ្តល់សេវាលិខិតឆ្លងដែនធម្មតាគំរូថ្មីនៅតាមខេត្តចំនួន០៣ រួមមាន÷
-សាខាលិខិតឆ្លងដែនប្រចាំខេត្តបាត់ដំបង អាសយដ្ឋាននៅដីឡូតិ៍លេខ F29 ភូមិជំនីក ឃុំអន្លង់វិល ស្រុកសង្កែ ខេត្តបាត់ដំបង ទូរស័ព្ទទំនាក់ទំនង ០៧០ ៨៦៨ ៦៨៨ ។
-សាខាលិខិតឆ្លងដែនប្រចាំខេត្តបន្ទាយមានជ័យ អាសយដ្ឋាន ផ្ទះលេខ៥២-៥៤ ភូមិគីឡូម៉ែត្រលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ ទូរស័ព្ទទំនាក់ទំនង ០៦១ ២១១ ១៩៨ ។
-សាខាលិខិតឆ្លងដែនប្រចាំខេត្តកោះកុង មានអាសយដ្ឋានស្ថិតនៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង ទូរស័ព្ទទំនាក់ទំនង ០៨១ ៨៤៤ ៨១២ ។
ជាមួយគ្នានេះ ការកែប្រែរយៈពេលនៃការផ្តល់សេវាលិខិតឆ្លងដែនធម្មតាគំរូថ្មី រួមមាន÷
-សេវាឆាប់រហ័ស រយៈពេល១ (មួយ) ថ្ងៃ នៃថ្ងៃធ្វើការងារ សម្រាប់ការផ្តល់សេវានៅរាជធានីភ្នំពេញ លើកលែងតែនៅតាមបណ្តាសាខាលិខិតឆ្លងដែនប្រចាំខេត្ត គឺមានរយៈពេល៣ (បី) ថ្ងៃ នៃថ្ងៃធ្វើការងារ។
-សេវាឆាប់រហ័សកម្រិតមធ្យម ប្តូរពីរយៈពេល១០ (ដប់) ថ្ងៃ មកត្រឹម ៧ (ប្រាំពីរ) ថ្ងៃ នៃថ្ងៃធ្វើការងារ។
-សេវាធម្មតា ប្តូរពីរយៈពេល២០ (ម្ភៃ) ថ្ងៃ មកត្រឹម ១៥ (ដប់ប្រាំ) ថ្ងៃ នៃថ្ងៃធ្វើការងារ។
