ខេត្តព្រះសីហនុ-ដោយ: ខៀវ ប៉ូឡូ
ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ មានក្តីប្រាថ្នាចង់ឱ្យខេត្តព្រះសីហនុក្លាយជាខេត្តមួយដែលមានសុវត្ថិភាពម្ហូបអាហារ ត្បិតអីម្ហូបអាហារជាប្រភពឫសគល់នៃបញ្ហាសុខភាពដែលជាចំណុចសំខាន់បំផុតសម្រាប់គ្រប់ក្រុមគ្រួសារ ហើយខេត្តព្រះសីហនុជាខេត្តទេសចរណ៍មានការពាក់ព័ន្ធយ៉ាងសុីជម្រៅលើវិស័យម្ហូបអាហារផងដែរ។
ខ្លឹមសារដើមទាំងស្រុងក្នុងទំព័រហ្វេសប៊ុកផ្ទាល់ខ្លួនរបស់ ឯកឧត្តម យន្ត មីន មានអត្ថន័យដូចខាងក្រោម÷
ខ្ញុំមានក្តីប្រាថ្នាចង់ឱ្យខេត្តព្រះសីហនុក្លាយជាខេត្តមួយដែលមានសុវត្ថិភាពម្ហូបអាហារ ត្បិតអីម្ហូបអាហារជាប្រភពឫសគល់នៃបញ្ហាសុខភាពដែលជាចំណុចសំខាន់បំផុតសម្រាប់គ្រប់ក្រុមគ្រួសារ ហើយខេត្តព្រះសីហនុជាខេត្តទេសចរណ៍មានការពាក់ព័ន្ធយ៉ាងសុីជម្រៅលើវិស័យម្ហូបអាហារផងដែរ។ ដើម្បីសម្រេចក្តីប្រាថ្នានេះ ខ្ញុំមានផែនការជម្រុញឱ្យគ្រប់អាហារដ្ឋានទាំងអស់ប្រែក្លាយពីការប្រកួតប្រជែងគ្នាដើម្បីតែប្រាក់ចំណេញមកជាការប្រកួតប្រជែងគ្នាផ្តល់សេវាម្ហូបអាហារដែលមានសុវត្ថិភាពដល់សុខភាព (អត់គីមី អនាម័យល្អ សេវាល្អ…) ដើម្បីប្រាក់ចំណេញវិញ។
ក្នុងគោលដៅនេះ យើងខ្ញុំនឹងរៀបចំក្រុមការងារមួយ សម្រាប់ដំណើរការអនុវត្ត ហើយក្រុមការងារនឹងចុះដាក់ពិន្ទុ បិទសញ្ញាសម្គាល់តាមអាហារដ្ឋាន និងទីតាំងផ្គត់ផ្គង់ម្ហូបអាហារនានានូវកំរិតសុវត្ថិភាពម្ហូបអាហារ ដើម្បីមានភាពងាយស្រួលដល់បងប្អូនធ្វើការជ្រើសរើស។
ជាការចាប់ផ្តើមនូវចលនានេះផង និងដើម្បីឱ្យថ្ងៃចម្រើនព្រះជន្មសម្តេចវរាជមាតាជាតិខ្មែរនាពេលខាងមុខនេះមានភាពអធិកអធមផង យើងខ្ញុំគ្រោងនឹងរៀបចំពិធីពិព័រណ៍ម្ហូបអាហារមួយដែលឆ្លៀតពេលនោះក្រុមការងារយើងនឹងធ្វើការពន្យល់លម្អិតថែមទៀតនូវការងារបច្ចេកទេស។
ក្នុងនាមគណៈអភិបាលខេត្ត ខ្ញុំសូមអំពាវនាវដល់បងប្អូនទាំងអស់មេត្តាផ្តល់មតិយោបល់ថែមទៀត លើគំនិតផ្តួចផ្តើមនេះ ដើម្បីឱ្យផែនការនេះសម្រេចបានដោយជោគជ័យផ្លែផ្កាល្អ។
សូមបងប្អូនទាំងអស់មេត្តាត្រៀមចូលរួមក្នុងកម្មវិធីខាងលើ និងមេត្តាជួយគាំទ្រចលនានេះ ដើម្បីជាការការពារសុខភាពខ្លួនឯង និងក្រុមគ្រួសារតាមរយៈការលើកទឹកចិត្តអាហារដ្ឋានដែលផ្តល់សេវាម្ហូបអាហារដែលមានសុវត្ថិភាព។
សូមអំពាវនាវដល់ម្ចាស់អាហារដ្ឋានទាំងអស់មេត្តាចូលរួមគាំទ្រយ៉ាងពេញទំហឹងនូវចលនានេះ ហើយសូមអញ្ជើញមករៀបចំតូបសម្រាប់តាំងពិព័រណ៍ម្ហូបអាហាររបស់ខ្លួនឱ្យបានច្រើនកុះករក្នុងពិធីពិព័រណ៍ម្ហូបអាហារតាមកម្មវិធីដែលនឹងជម្រាបជូននៅពេលក្រោយ ៕
