ខេត្តព្រះសីហនុ-ដោយ: ខៀវ ប៉ូឡូ
យ៉ាងហោចណាស់អ្នកដំណើរប្រមាណជា ៣៥នាក់ដែលជាកម្មកររោងចក្របានរងរបួសនាព្រឹកថ្ងៃអង្គារ ៥រោច ខែផល្គុន ឆ្នាំរកា នព្វស័ក ព.ស.២៥៦១ ត្រូវនឹងថ្ងៃទី០៦ ខែមីនា ឆ្នាំ២០១៨ ក្នុងគ្រោះថ្នាក់ចរាចរឡានបុកគ្នានៅលើផ្លូវជាតិលេខ៤ ដោយឡាន ៥ គ្រឿងបុកបន្តកន្ទុយគ្នា ស្ថិតនៅក្នុងភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ នៅចន្លោះគីឡូម៉ែត្រលេខ ២១០-២១១។
ប្រភពពីមន្ត្រីនគរបាលនៃស្នងការនគរបាលខេត្តព្រះសីហនុទទួលបន្ទុកផ្នែកសណ្ដាប់ធ្នាប់ចរាចរណ៍បានឱ្យដឹងថា មូលហេតុរថយន្តម៉ាក HYUNDAI ពណ៌ ស ពាក់ផ្លាកលេខព្រះសីហនុ 3A-6175 ដឹកទឹកកក មានទិសដៅពីខេត្តកំពត ឆ្ពោះមកខេត្តព្រះសីហនុ មុនពេលកើតហេតុ បានឈប់ចាក់ប្រេងហ្វ្រាំង ស្មាច់ដែង រួចបន្តដំណើរទៅមុខ លុះដល់ចំណុចកើតហេតុ បានបើក ឡើងវ៉ាជែងរថយន្តដឹកកម្មករ ពេលឃើញឧបសគ្គមកពីខាងមុខ ក៏បានគេចចូលមកស្តាំវិញ តែហ្វ្រាំងមិនស៊ី បានបុកពីក្រោយរថយន្ត ១គ្រឿងម៉ាក SSANGYONG ពណ៌ ស ពាក់ផ្លាកលេខភ្នំពេញ2AA-7657 បុកបន្តរថយន្តទី២ ម៉ាក SSANGYONG ពណ៌ ស ពាក់ផ្លាកលេខ ភ្នំពេញ2M-6306 បុកបន្តរថយន្តទី៣ ម៉ាក SSANGYONG ពណ៌ លឿង ពាក់ផ្លាកលេខព្រះសីហនុ2A-5786 បុកបន្តរថយន្តទី៤ ម៉ាក SSANGYONG ពណ៌ ខៀវ ពាក់ផ្លាកលេខព្រះសីហនុ2A-4594 ។
មន្ត្រីនគរបាលដដែលបានបញ្ជាក់បន្ថែមថា “គ្រោះថ្នាក់នេះបណ្ដាលឲ្យរងរបួសមនុស្សចំនួន ៣៥នាក់ ស្រី ៣១នាក់ (ស្រាល ៣២នាក់ ស្រី ៣នាក់ ប៉ុន្ដែមិនមានអ្នកស្លាប់ទេ) របួសធ្ងន់បាក់ជើងចំនួន ៣នាក់ ស្រី១នាក់ អ្នករបួសទាំងអស់ បានបញ្ជូនទៅព្យាបាលនៅមន្ទីរ ពេទ្យផ្សេងៗគ្នាក្នុងខេត្តព្រះសីហនុ។ បច្ចុប្បន្ន រថយន្តចំនួន៥គ្រឿងបានយកមករក្សាទុកនៅការិយាល័យនគរបាលចរាចរណ៍ផ្លូវគោក”។
ក្រោយពេលកើតហេតុ ឯកឧត្តម យន្ត មីន អភិបាលនៃគណៈអភិបាលខេត្តព្រះសីហនុ បានអញ្ជើញចុះសួរសុខទុក្ខអ្នករងគ្រោះទាំងនោះនៅគ្រប់មន្ទីរពេទ្យក្នុងខេត្តព្រះសីហនុផងដែរ៕
