ខេត្តតាកែវ-ដោយ: សុភ័ក្ត្រ
នាព្រឹកថ្ងៃទី១៣ ខែកញ្ញា ឆ្នាំ២០១៧នេះ លោក ហ៊ុន សុខា អនុប្រធានក្រុមការងារចុះជួយក្រុងដូនកែវ ខេត្តតាកែវ និងជាប្រធានក្រុមការងារកិត្តិយសចុះជួយសង្កាត់បារាយណ៍ បានអញ្ជើញចូលរួមជាអធិបតីក្នុងពិធីជួបសំណេះសំណាលជាមួយប្រជាការពារ និងប្រជាពលរដ្ឋ សង្កាត់បារាយណ៍ ក្រុងដូនកែវ ខេត្តតាកែវ។
ពិធីសំណេះសំណាលនេះដែរ មានការអញ្ជើញចូលរួមពីសំណាក់លោកអភិបាលក្រុងដូនកែវ លោក លោកស្រីប្រធានមន្ទីរ មន្ត្រីសាលាក្រុង ជាច្រើនរូប។
លោក ម៉ែន ចឹម ចៅសង្កាត់បារាយណ៍បានឡើងអានរបាយការណ៍អំពីការរីកចម្រើន និងការថែរក្សាសន្តិសុខសុវត្ថិភាពជូនប្រជាពលរដ្ឋក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌនាពេលខាងមុខនេះដែលកំពុងប្រព្រឹត្តទៅដោយរលូន និងពុំមានអ្វីខុសប្រក្រតីនោះឡើយ។
ប៉ុន្តែ អ្វីដែលប្រជាពលរដ្ឋកំពុងជួបបញ្ហានោះ គឺដំណាំស្រូវរបស់ពួកគាត់ពុំមានទឹកគ្រប់គ្រាន់សម្រាប់ស្រោចស្រព បង្កបង្កើតផលនោះទេ។
ឆ្លៀតក្នុងឱកាសនោះដែរ លោក ហ៊ុន សុខា បានមានមតិសំណេះសំណាលជាមួយប្រជាការពារ និងប្រជាពលរដ្ឋ ដោយបានកោតសរសើរចំពោះប្រជាការពារសង្កាត់បារាយណ៍ដែលខិតខំប្រឹងប្រែងថែរក្សាសន្តិសុខ សណ្តាប់ធ្នាប់ និងសុវត្ថិភាពជូនប្រជាពលរដ្ឋបានយ៉ាងល្អក្នុងពេលកន្លងមក ជាពិសេសក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌនាពេលនេះ។
លោក ហ៊ុន សុខា បានបន្តថា “ភាពសុខដុមរមនារបស់មហាគ្រួសារខ្មែរ ពិសេសស្នាមញញឹម ភាពសប្បាយរីករាយរបស់ប្រជាពលរដ្ឋក្នុងឱកាសបុណ្យទាននានាមានដូចសព្វថ្ងៃនេះក៏ដោយសារតែប្រទេសកម្ពុជាមានសន្តិភាព ស្ថេរភាពសង្គម និងការអភិវឌ្ឍលើគ្រប់វិស័យក្រោមការដឹកនាំប្រកបដោយគតិបណ្ឌិតរបស់ប្រមុខរាជរដ្ឋាភិបាលដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា”។
ឆ្លើយតបចំពោះបញ្ហាខ្វះទឹកស្រោចស្រពដំណាំស្រូវ ក្នុងការបង្កបង្កើតផលកសិកម្មរបស់ប្រជាកសិករក្នុងសង្កាត់បារាយណ៍ ក្រុងដូនកែវ ខេត្តតាកែវ លោក ហ៊ុន សុខា បានស្នើចំពោះលោកចៅសង្កាត់ ដើម្បីរៀបចំដោះស្រាយជូនប្រជាកសិករឲ្យទាន់ពេលវេលា ព្រមទាំងជួយឧបត្ថម្ភថវិកាចំនួន ១.២០០.០០០រៀល ( មួយលានពីរសែនរៀល ) សម្រាប់ទិញប្រេងម៉ាស៊ូត ៥០០លីត្របូមទឹកចូលប្រឡាយឱ្យប្រជាកសិករបានប្រើប្រាស់ និងដោះស្រាយបញ្ហាចំពោះមុខជាបណ្តោះអាសន្ន។
ក្នុងកម្មវិធីនេះដែរ លោក ហ៊ុន សុខា រួមនឹងក្រុមការងារចុះជួយសង្កាត់បារាយណ៍បានឧបត្ថម្ភថវិកាជូនប្រជាការពារ និងប្រជាពលរដ្ឋដែលបានចូលរួមក្នុងម្នាក់ៗទទួលបានថវិកាចំនួន ១០០០០៛ ( មួយម៉ឺនរៀល )។
នាព្រឹកថ្ងៃដដែល លោក ហ៊ុន សុខា រួមនឹងក្រុមការងារក៏បានចុះជួបសំណេះសំណាលជាមួយលោកគ្រូ អ្នកគ្រូក្នុងសាលាបឋមសិក្សាវត្តត្រសក់ផ្អែមនឹងបាននាំយកអំណោយកុំព្យូទ័រ ( Computer ) ចំនួន ០១គ្រឿង និងម៉ាស៊ីនព្រីន ( Printer ) ចំនួន ០១គ្រឿង ប្រគល់ជូនលោកគ្រូ អ្នកគ្រូ តាមការស្នើសុំ ព្រមទាំងក្រមាចំនួន២០ និងថវិកាសម្រាប់លោកគ្រូ អ្នកគ្រូក្នុងម្នាក់ៗចំនួន ២០០០០៛ ( ពីរម៉ឺនរៀល ) ផងដែរ។
លោក ហ៊ុន សុខា បានថ្លែងអំណរគុណយ៉ាងជ្រាលជ្រៅបំផុតចំពោះលោកគ្រូ អ្នកគ្រូ ដែលបានយកចិត្តទុកដាក់ក្នុងការបង្ហាត់បង្រៀន និងអប់រំសិស្សានុសិស្សនាពេលកន្លងមក ហើយលោកបានលើកទឹកចិត្តចំពោះលោកគ្រូ អ្នកគ្រូឲ្យខិតខំបន្ថែមទៀត ធ្វើយ៉ាងណាឲ្យសិស្សានុសិស្សទទួលបានចំណេះដឹងគ្រប់គ្រាន់ ដើម្បីចូលរួមចំណែកក្នុងការកសាងសង្គមកម្ពុជាឲ្យកាន់តែរីកចម្រើនបន្ថែមទៀត។
លោក ហ៊ុន សុខា បានសន្យាផ្តល់ជូននូវសៀវភៅ និងសម្ភារៈសិក្សាមួយចំនួនទៀត សម្រាប់ចែកជូនដល់សិស្សានុសិស្សនៅសាលាបឋមសិក្សាវត្តត្រសក់ផ្អែម ក្នុងពេលបវេសនកាលខាងមុខនេះ ដើម្បីឆ្លើយតបក្នុងតម្រូវការ និងការខ្វះខាតរបស់សិស្សានុសិស្ស៕
