រាជធានីភ្នំពេញ-ដោយ: សុភ័ក្ត្រ
តបតាមការអញ្ជើញរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តម ឧត្តមសេនីយ៍ ប្រាយុទ្ធ ច័ន្ទអូឆា ( Prayut Chan-o-cha ) នាយករដ្ឋមន្ត្រី នៃព្រះរាជាណាចក្រថៃ នឹងដឹកនាំគណៈប្រតិភូអញ្ជើញមកបំពេញទស្សនកិច្ចផ្លូវការនៅកម្ពុជា នៅថ្ងៃទី០៧ ខែកញ្ញា ឆ្នាំ២០១៧ នាពេលដ៏ខ្លីខាងមុខនេះ។
យោងតាមសេចក្តីជូនព័ត៌មានរបស់ក្រសួងការបរទេស និងសហប្រតិបតិ្តការអន្តរជាតិ នៃប្រទេសកម្ពុជា ចុះថ្ងៃទី០១ ខែកញ្ញា ឆ្នាំ២០១៧ បានឱ្យដឹងថា ឯកឧត្តម ឧត្តមសេនីយ៍ ប្រាយុទ្ធ ច័ន្ទអូឆា ( Prayut Chan-o-cha ) នាយករដ្ឋមន្ត្រី នៃព្រះរាជាណាចក្រថៃនឹងគណៈប្រតិភូ និងជួបពិភាក្សាទ្វេភាគីជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
ក្នុងសេចក្តីជូនព័ត៌មានបានឱ្យដឹងបន្ថែមថា ក្នុងអំឡុងពេលទស្សនកិច្ចផ្លូវការនេះ សម្តេចតេជោ ហ៊ុន សែន និងឯកឧត្តម ឧត្តមសេនីយ៍ ប្រាយុទ្ធ ច័ន្ទអូឆា នឹងអញ្ជើញធ្វើជាសហប្រធានកិច្ចប្រជុំចង្អៀតគណៈរដ្ឋមន្ត្រីចម្រុះកម្ពុជា-ថៃ លើកទី៣។
ក្រោមមូលបទ “ពង្រឹងភាពជាដៃគូ ដើម្បីសន្តិភាព និងវិបុលភាព” កិច្ចប្រជុំចង្អៀតគណៈរដ្ឋមន្ត្រីចម្រុះកម្ពុជា-ថៃ លើកទី៣នេះ នឹងផ្ដល់មគ្គុទេសក៍ និងទិសដៅក្នុងការជម្រុញបន្ថែមទៀតនូវទំនាក់ទំនង និងកិច្ចសហប្រតិបត្តិការដ៏ល្អប្រសើរ ដែលនឹងផ្តល់ផលប្រយោជន៍ថែមមួយកម្រិតទៀត ដល់ព្រះរាជាណាចក្រទាំងពីរ។
នៅចុងបញ្ចប់នៃកិច្ចប្រជុំចង្អៀតគណៈរដ្ឋមន្ត្រីចម្រុះកម្ពុជា-ថៃ លើកទី៣នេះ សម្តេចអគ្គមហាសេនាបតីតេជោ ហ៊ុន សែន និងឯកឧត្តម ឧត្តមសេនីយ៍ ប្រាយុទ្ធ ច័ន្ទអូឆា នឹងអញ្ជើញធ្វើជាអធិបតីក្នុងពិធីចុះហត្ថលេខាលើឯកសារសំខាន់ៗមួយចំនួន។ បន្ទាប់ពីនោះ ភាគីទាំងពីរ នឹងធ្វើសេចក្តីប្រកាសព័ត៌មានរួមគ្នាមួយ ក្រោយពីពិធីចុះហត្ថលេខារួច។
ឯកឧត្តម ឧត្តមសេនីយ៍ ប្រាយុទ្ធ ច័ន្ទអូឆា ក៏នឹងជួបសម្ដែងការគួរសមជាមួយសម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងជាប្រមុខរដ្ឋស្តីទី។
ក្នុងឱកាសទស្សនកិច្ចនេះ នាយករដ្ឋមន្ត្រីទាំងពីរ នឹងអញ្ជើញសម្ពោធសួនមិត្តភាពកម្ពុជា-ថៃ នៅរាជធានីភ្នំពេញផងដែរ។
