រាជធានីភ្នំពេញ-ដោយ: សុភ័ក្ត្រ
កិច្ចប្រជុំអន្តរក្រសួងស្តីពី ” ការដោះស្រាយបញ្ហាពាក់ព័ន្ធនឹងដីសម្បទានសេដ្ឋកិច្ចដំណាំអំពៅផលិតស្ករសនាំចេញ ” ក្រោមអធិបតីភាព ឯកឧត្តមទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងមានការចូលរួមពី ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តម សាយ សំអាល់ រដ្ឋមន្ត្រីក្រសួងបរិស្ថាន តំណាងក្រសួង ស្ថាប័ន និងអាជ្ញាធរថ្នាក់ក្រោមជាតិ។
កិច្ចប្រជុំអន្តរក្រសួងនេះបានធ្វើឡើងនៅទីស្ដីការក្រសួងរៀបចំដែនដី នគរូបនីយកម្ម និងសំណង់ នាព្រឹកថ្ងៃទី៣០ ខែសីហា ឆ្នាំ២០១៧។ នេះបើយោងតាមសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ ចុះថ្ងៃពុធ ៩កើត ខែភទ្របទ ឆ្នាំរកា ព.ស. ២៥៦១ ត្រូវនឹងថ្ងៃទី៣០ ខែសីហា គ.ស. ២០១៧។
ក្នុងសេចក្តីប្រកាសព័ត៌មានដដែលក៏បានបង្ហាញលទ្ធផលជាផ្លែផ្កាដូចខាងក្រោម÷
១-ឯកឧត្តមទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ទទួលសម្របសម្រួល និងដោះស្រាយករណីវិវាទដីធ្លីខាងលើនេះ។ ក្រុមការងារអន្តរក្រសួងចំពោះកិច្ចនឹងបន្តភារកិច្ចដដែល។
២-ប្រគល់ភារកិច្ចជូនប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តកោះកុង ខេត្តកំពង់ស្ពឺ និងខេត្តព្រះវិហារ សម្របសម្រួលបំពេញទម្រង់បែបបទ និងធ្វើអត្តសញ្ញាណកម្មប្រជាពលរដ្ឋ និងទីតាំងដីពាក់ព័ន្ធរយៈពេល ៣០ថ្ងៃ នៅសាលាស្រុកឱរ៉ាល់ ខេត្តកំពង់ស្ពឺ សាលាស្រុកស្រែអំបិល ខេត្តកោះកុង សាលាស្រុកត្បែងមានជ័យ និងស្រុកជ័យសែន ខេត្តព្រះវិហារ។
៣-ក្រសួងរៀបចំដែនដី នគរូបនីយកម្ម និងសំណង់ សូមគោរពអញ្ជើញបងប្អូនប្រជាពលរដ្ឋដែលមានបញ្ហាពាក់ព័ន្ធនឹងដីវិវាទមកបំពេញទម្រង់បែបបទតាមទីតាំងកំណត់ខាងលើចាប់ពីថ្ងៃទី០៤ ខែកញ្ញា ដល់ ថ្ងៃទី០៣ ខែតុលា ឆ្នាំ២០១៧។
ក្នុងសេចក្តីប្រកាសព័ត៌មានក៏បានព្រមានចាត់វិធានការចំពោះបុគ្គលទាំងឡាយណាដែលក្លែងបន្លំឯកសារ ឬញុះញង់បង្កបញ្ហាត្រូវទទួលខុសត្រូវចំពោះមុខច្បាប់ជាធរមាន។
