ខេត្តបន្ទាយមានជ័យ-ដោយ: សុភ័ក្ត្រ
លោកវរសេនីយ៍ឯក បោន ប៊ិន អតីតមេបញ្ជាការរងកងរាជអាវុធហត្ថខេត្តត្រូវបានប្រកាសចូលកាន់ដំណែងជាមេបញ្ជាការកងរាជអាវុធហត្ថខេត្តបន្ទាយមានជ័យជាផ្លូវការជំនួស ឯកឧត្តម ឧត្តមសេនីយ៍ត្រី ឱ បូរិន្ទ ដែលត្រូវផ្ទេរភារកិច្ចជានាយរងសេនាធិការ នៃបញ្ជាការដ្ឋានកងរាជអាវុធហត្ថលើផ្ទៃប្រទេសវិញ។
ពិធីប្រកាសផ្លាស់ប្តូរមុខងារមេបញ្ជាការកងរាជអាវុធហត្ថខេត្តបន្ទាយមានជ័យនេះត្រូវបានធ្វើឡើងនៅព្រឹកថ្ងៃទី២៨ ខែសីហា ឆ្នាំ២០១៧ នៅបញ្ជាការដ្ឋានកងរាជអាវុធហត្ថខេត្តបន្ទាយមានជ័យ ក្រោមអធិបតីភាព ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស។
លោកវរសេនីយ៍ឯក បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យដែលទើបតែងតាំងថ្មី បានធ្វើការប្ដេជ្ញាចិត្តថានឹងស្មោះត្រង់ចំពោះព្រះមហាក្សត្រ រាជរដ្ឋាភិបាល និងអនុវត្តឱ្យខាងតែបានទៅតាមបទបញ្ជារបស់ថ្នាក់ដឹកនាំព្រមទាំងសាមគ្គីភាពផ្ទៃក្នុង និងជាមួយស្ថាប័នពាក់ព័ន្ធជាពិសេសការបង្ការ និងបង្ក្រាបនូវរាល់បទល្មើសដែលកើតមានក្នុងមូលដ្ឋានឱ្យមានប្រសិទ្ធភាពខ្ពស់។
